ਸਾਨੂ ਪੱਗ ਨੇ ਵਖਰੀ ਸ਼ਾਨ ਦਿੱਤੀ
ਪੱਗ ਕਰਕੇ ਮਿਲੀਆਂ ਸਰਦਾਰੀਆਂ ਨੇ
ਨਿਰਾ ਕਪੜੇ ਦਾ ਨਹੀ ਟੁਕੜਾ ਇਹ
ਕਦਰਾਂ ਕੀਮਤਾਂ ਵਿਚ ਸ਼ੁਮਾਰੀਆਂ ਨੇ
ਪੱਗ ਨਾਲ ਹੀ ਵਖਰਾ ਟੌਰ ਜਾਪੇ
ਲਗਨ ਸੂਰਤਾਂ ਕਿੰਜ ਪਿਆਰੀਆਂ ਨੇ
ਸਿਰ ਤੇ ਸਦਾ ਸਜਾਈ ਸੋਭਦੀ ਹੈ
ਰੰਗ ਜੇਹੜਾ ਵੀ ਦਿੱਤਾ ਲਲਾਰੀਆਂ ਨੇ
ਪੱਗਾਂ ਵਾਲਿਆਂ ਪੱਗਾਂ ਉਛਾਲੀਆਂ ਨਹੀ
ਪੱਗਾਂ ਖਾਤਿਰ ਵੀ ਜਾਨਾਂ ਵਾਰੀਆਂ ਨੇ
ਪੱਗਾਂ ਉੱਤੇ ਰੰਬੀਆਂ ਵਾਰ ਕੀਤਾ
ਸਿਰਾਂ ਉੱਤੇ ਚਲੀਆਂ ਆਰੀਆਂ ਨੇ
ਪੱਗ ਬੜੀ ਹੈ ਅੱਜ ਬਦਨਾਮ ਕੀਤੀ
ਆਕੜ ਖੋਰ ਅਤੇ ਅਹੰਕਾਰੀਆਂ ਨੇ
ਅਜਕਲ ਪੱਗਾਂ ਵਾਲੇ ਪੱਗਾਂ ਲਾਹੀ ਜਾਂਦੇ
ਪੱਗਾਂ ਪੈਰਾਂ ਦੇ ਵਿਚ ਖਿਲਾਰੀਆਂ ਨੇ
ਪੱਗ ਬਣੇ ਪੱਟੀ ਸੋਚ ਬਣੇ ਮਰਹਮ
ਐਦਾਂ ਕਿਸੇ ਦੇ ਫੱਟ ਲੁਕਾਓ ਸਿਖੋ
ਪੱਗ ਨਾਲ ਜੇ ਕਿਸੇ ਦਾ ਤਨ ਢਕ ਜਏ
ਸਿਰੋਂ ਲਾਹਕੇ ਵੀ ਇਜ਼ਤ ਕਮਾਓ ਸਿਖੋ
ਪੱਗ ਈਗੋ ਦਾ ਨਹੀ ਪਰਤੀਕ ਹਰਗਿਜ਼
ਦਾਗ ਪੱਗ ਨੂ ਐਸਾ ਨਾ ਲਾਓ ਸਿਖੋ
ਸੂਰਤ ਵਿਚੋਂ ਸੀਰਤ ਝਲਕ ਆਵੇ
ਐਦਾਂ ਪੱਗ ਦਾ ਮਾਨ ਵਧਾਓ ਸਿਖੋ
'ਨੂਰ' ਪੱਗ ਦਾ ਮਾਨ ਵਧਾਓ ਸਿਖੋ
No comments:
Post a Comment