ਉਠ ਸਵੇਰੇ ਬਾਣੀ ਪੜਨਾ ਔਖਾ ਲਗਦਾ ੲੇ
ਸਾਹਾਂ ਦਾ ਸ਼ੁਕਰਾਨਾ ਕਰਨਾ ਔਖਾ ਲਗਦਾ ੲੇ
ਕਰ ਅਰਦਾਸਾਂ ਝੱਟ ਮੁਰਾਦਾਂ ਪੂਰਨ ਕਰ ਲੈਨੈਂ
ਗੁਰ ਦਰ ਤੇ ਇਕ ਡਾਲਰ ਧਰਨਾ ਔਖਾ ਲਗਦਾ ੲੇ
ਯਾਦ ਸ਼ਹੀਦਾਂ ਨੂੰ ਕਰਕੇ ਬਸ ਯਾਦ ਮਨਾ ਲੈਨੈਂ
ਆਪ ਕਿਸੇ ਲਈ ਪੈ ਜਏ ਮਰਨਾ ਔਖਾ ਲਗਦਾ ੲੇ
ਗੈਰਾਂ ਨੂੰ ਤਾਂ ਹੱਸ ਹੱਸ ਅਪਣਾ ਝੱਟ ਬਣਾ ਲੈਨੈਂ
ਆਪਣਿਆਂ ਦੇ ਵਿੱਚ ਵਿਚਰਨਾ ਔਖਾ ਲਗਦਾ ੲੇ
ਦਰਦੇ ਦਿਲ ਤੇ ਹੰਝੂ ਦੇਣ ਲਈ ਮਾਹਰ ਹੈਂ ਤੂੰ
ਕਿਸੇ ਲਈ ਇਕ ਹਉਕਾ ਭਰਨਾ ਔਖਾ ਲਗਦਾ ੲੇ
ਬਾਬੇ ਦੀ ਬਾਣੀ ਨੂੰ ਤਰਜ਼ਾਂ ਤੇ ਗਾ ਸੁਣ ਲੀਤਾ
ਤਰਜ਼ੇ ਜ਼ਿੰਦਗੀ ਵੈਸੀ ਕਰਨਾ ਔਖਾ ਲਗਦਾ ੲੇ
ਜਿੱਤ ਜਿੱਤ ਕੇ ਬਸ ਜਿੱਤਣ ਦੀ ਹੀ ਆਦਤ ਬਣ ਗਈ ਏ
ਜਿੱਤੀ ਹੋਈ ਬਾਜ਼ੀ ਹਰਨਾ ਔਖਾ ਲਗਦਾ ੲੇ
ਸਿਮਰਕੇ ਜਿਸਨੂੰ ਮਨ ਅੰਦਰ ਦੀ ਚਿੰਤਾ ਮੁੱਕ ਜਾਂਦੀ
ਸਾਸ ਸਾਸ ਗੋਬਿੰਦ ਸਿਮਰਨਾ ਔਖਾ ਲਗਦਾ ੲੇ
ਪੈਸੇ ਦੇ ਕੇ ਖੰਡ ਪਾਠ ਹਰ ਸਾਲ ਕਰਾ ਲੈਨੈਂ
ਸਹਿਜੇ ਸਹਿਜੇ ਆਪ ਉਚਰਨਾ ਔਖਾ ਲਗਦਾ ੲੇ
ਅਹੰਕਾਰ ਦੀ ਚੋਟੀ ਦੇ ਉੱਤੇ ਜਾ ਬੈਠਾ ਏਂ
ਓਥੋਂ ਹੁਣ ਹੇਠਾਂ ਉਤਰਨਾ ਔਖਾ ਲਗਦਾ ੲੇ
ਵੰਨ ਸੁਵੰਨੇ ਭੋਜਨ ਖਾ ਖਾਕੇ ਵੀ ਰੱਜਦਾ ਨਈਂ
ਗੁਰਬਤ ਮਾਰੇ ਦਾ ਢਿੱਡ ਭਰਨਾ ਔਖਾ ਲਗਦਾ ੲੇ
ਸਿਰ ਉੱਤੇ ਦਸਤਾਰ ਸਜਾ ਸਰਦਾਰ ਕਹਾ ਲਈਦਾ
ਸਿਰ ਨੂੰ ਤਲੀ ਦੇ ਉੱਤੇ ਧਰਨਾ ਔਖਾ ਲਗਦਾ ੲੇ
ਖਾਣ ਨੂੰ ਮਿਠਾ ਸੁਣਨ ਨੂੰ ਮਿਠਾ ਲਗਦਾ ਏ ਚੰਗਾ
ਆਪੂੰ ਮਿੱਠਾ ਬੋਲ ਉਚਰਨਾ ਔਖਾ ਲਗਦਾ ੲੇ
ਮੇਰਾ ਹੈ ਮੇਰਾ ਸਭ ਕੁਝ ਮੈ ਸਦਾ ਸਦੀਵੀ ਹਾਂ
ਏਹੋ ਝੂਠਾ ਸੱਚ ਵਿਸਰਨਾ ਔਖਾ ਲਗਦਾ ੲੇ
'ਨੂਰ' ਇਹ ਝੂਠਾ ਸੱਚ ਵਿਸਰਨਾ ਔਖਾ ਲਗਦਾ ੲੇ
~'ਨੂਰ'
No comments:
Post a Comment